mossybaa

الحكاية يا جدعان اني قررت " لا نوم بعد اليوم " قرأت بحث مضروب عن النوم و الخلاصة اللي فيه العلماء مش عارفين النوم فائدته ايه !! يعني مثلا لقوا ان طاقة الانسان قبل النوم بتساوي بعده , و حته اللي ايدوا النوم زي الجدع ده اللي رئيس جمعية النوم البريطانية نيل ستاندلي ان النوم مش مضيعة للوقت وبلا فائدة , و قال ان فائدته تحقيق مستوى أفضل من الأداء اثناء قيادة المركبات، ولعب الآلات الموسيقية والقيام بالالعاب الرياضية المتنوعة بس علي مين ... دا أنا أكبر مفتي فيكي يا بلد ...
لاء و كمان الواحد بيطول و هوه نايم .. و العبدلله مش لازمه طووووووول
قولت ايه يا عم ... انا قولت الجماعة بتوع السورياليه -بتوع اندريه بروتون_ كان هدفهم (إملاءً من الفكر اللاوعي في غياب كل مراقبة من العقل والمنطق) و طرقتهم للوصول للحالة دي هيا ... الهبل و الشرب و بالمخدرات ... و اديها يا ريس قال ايه المخدرات .. تسيرُ الفرد من قبل قوة داخلية تقهر كل المقاومات .. الواعية اليومية
انا بقي قولت ما هو انا لو امتنعت عن النوم هوصل للحالة دي من غير لا شرب و لا مخدرات و لا قرف من ده ... و طبعا الحكايه مش سايبه كده انا عملت بحث ... و لقيت حاجه مهمه جدا .. في سورة المزمل " قُمِ اللَّيْلَ إِلاَّ قَلِيلاً (2) نِّصْفَهُ أَوِ انقُصْ مِنْهُ قَلِيلاً (3)" و كمان كان السلف بعضهم فضل 30 سنه بيلصي الفجر بوضوء العشاء طبعا كانوا يأخذون هجعة "خدت انته بالك من هجعة دي "خفيفة بعد طلوع الشمس انا قعدت مع نفسي احسبها كده لقيت الحاجه البشرية للنوم طلع ... ساعاتان في الصيف , و ثلاث ساعات في الشتاء
و على دا الحال انا ... بس علي فكرة انا اوقات بناااااااااام بال 12 ساعة و طبعا بنام مش من التعب ... من الملل .. ايه هموا انتوا يعني مش عرفينوا
جرب كده .. و مش مهم اللي بيحصل في أول 3 ايام يعني ممكن متخفش لو شوفت حاجات غريبه .. ده حاجه طبيعيه .. و عادي لو بقيت عصبي .. و مفيش مشكلة لو كسرت الكمبيوتر أو حتى قعدت تكلم نفسك .. ما هي دي بقي حالة اللاوعي اللي الناس بتاخد مخدرات علشانها اهي ببلاش و من غير ضرر
اه صحيح اللي يعمل كده يقوووول و يحكي لنا عن تجربته